Category Archives: Kitaifa

Habari za ndani ya nchi

DK. MAGUFULI AMEWAAPISHA MABALOZI 4 ALIOWATEUA KARIBUNI KUIWAKILISHA TANZANIA KATIKA NCHI NYENGINE

Rais wa Jamhuri ya Muungano wa Tanzania, mhe. Dk. John Pombe Magufuli amewaapisha mabalozi 4 aliowateua hivi karibuni kuiwakilisha Tanzania katika nchi za Afrika Kusini, Namibia, Zimbabwe na Nigeria.

Walioapishwa ni Mej. Jen (mstaafu) Gaudence Salim Milanzi anayekuwa balozi wa Tanzania Pretoria - Afrika Kusini, Dk. Modestus Francis Kipilimba anayekuwa balozi wa Tanzania Windhoek – Namibia, Prof. Emmanuel David Mwaluko Mbennah anayekuwa balozi wa Tanzania Harare – Zimbabwe na Dk. Benson Alfred Bana anayekuwa balozi wa Tanzania Abuja – Nigeria.

Akizungumza mara baada ya kuwaapisha Mabalozi hao, Mhe. Rais Magufuli amewataka kuripoti katika vituo walivyopangiwa ndani ya wiki 2 kuanzia sasa na amewasisitiza kutekeleza majukumu yao kwa mujibu wa sheria, na kuzingatia maslahi ya Taifa hasa kiuchumi na kuwawezesha Watanzania kupata ajira katika fursa zilizopo katika nchi hizo.

Waziri wa Mambo ya Nje na Ushirikiano wa Afrika Mashariki, Mhe. Prof. Palamagamba Kabudi amewataka Mabalozi hao kuitangaza vyema Tanzania ambayo kwa sasa inapiga hatua kubwa katika maeneo mengi.

Hafla ya kuapishwa kwa Mabalozi hao imefanyika Ikulu jijini Dar es salaam na kuhudhuriwa na viongozi mbalimbali wakiwemo Makamu wa Rais, Mhe. Samia Suluhu Hassan na Waziri Mkuu Mhe. Kassim Majaliwa Majaliwa

WANAFUNZI NA WATENDAJI WA SERIKALI WALIOSOMA NCHINI CHINA WANAJUKUMU KUBWA LA KUITUMIA ELIMU WALIOIPTA KUHAMASISHA MAENDELEO

Waziri wa fedha na mipango Balozi Mohamed Ramia Abdiwawa amesema wanafunzi na watendaji wa Serikali waliosoma nchini China wanajukumu kubwa la kuitumia elimu walioipta kuhamasisha maendeleo ya uchumi na kijamii visiwani Zanzibar.

Balozi Mohamed Ramia akizungumza katika mafunzokwa wanafunzi waliopata udhamini wa masomo kutoka china amesema nchi hiyo imekuwa ikitoa nafasi za udhamini wa masomo katika kada mbali mbali kwa lengo la kuisaidia Zanzibar kupiga hatua za kimaendeleo .

Amefahamisha China imekuwa rafiki wa muda mrefu kwa Zanzibar hivyo Serikali itaendelea kuthamini ushirikiano huo kwa maslahi ya pande zote mbili.

Balozi mdogo wa China nchini Tanzania amesema katika kipindi cha miaka minne iliyopita china imetoa nafasi 126 za udhamini wa masomo kwa ngazi ya shahada na nafasi 700 kwa mafunzo ya muda mfupi katika kada  za kilimo, uchumi, mawasiliano, uwekezaji elimu na afya.

Wanafanyakazi na wanafunzi waliopata udhamini wa masomo kotoka China wameahidi kuitumia uzoefu walioupata katika kipindi chote cha masomo nchini china kwa kubuni miradi mbali mbali yenye lengo la kuisadia Zanzibar kufikia uchumi wa kati.

SUMAIT KUWA NA HADHI YA KIMATAIFA KATIKA SEKTA YA UFUNDISHAJI NA UTAFITI.

 

Mkuu wa Chuo Kikuu cha Abdulrahman Al-sumait Mh: Abeid Amani Karume ameuomba uongozi wa chuo hicho kutafuta njia zaidi ya kukuza chuo hicho kuwa na hadhi ya kimataifa katika sekta ya ufundishaji na utafiti.

akizungumza katika mahafali ya 19 ya chuo hicho huko Chukwani amesema chuo cha Sumait kimekuwa kikitoa taaluma kwa muda mrefu ambayo imeimarika zaidi ukilinganisha na miaka ya nyuma hivyo ni vyema kuangalia njia za kutanua zaidi huduma zao kuwa za kimataifa.

Naibu Waziri wa Elimu na mafunzo ya amali Mh: Simai Moh’d Saidi akizungumza kwa niaba ya Waziri wa Wizara hiyo amewaomba wahitimu hao kuwa wazalendo wa Nchi yao pale wanapopata fursa za ajira nje ya Nchi.

Mahafali hayo yamehudhuriwa na viongozi mbali mbali akiwemo Balozi wa Kuwait nchini Tanzania, ambapo jumla ya wahitimu 354 wametunikiwa vyeti vyao ikiwa 237 wahitimu wa stashahada, 59 shahada na cheti 58.

KIJIJI CHA PAJE KUJENGWA UWANJA WA KUTUA HELKOPTA

 

Wizara ya ujenzi, mawasiliano na usafirishaji imesema inafuatilia kupatikana kwa umiliki wa ardhi katika eneo linalotarajiwa kujengwa uwanja wa kutua Helkopta katika kijiji cha Paje Mkoa wa Kusini Unguja.

Waziri wa ujenzi, mawasiliano na usafirishaji, Dkt. Sira Ubwa Mamboya, akizungumza mara baada ya ziara ya kukagua eneo hilo ameutaka uongozi wa mamlaka ya viwanja vya ndege Zanzibar kuendelea kufuatilia umiliki huo kwa vile wananchi tayari wameshalipwa ili utarati za ujenzi zianze.

Afisa miradi kutoka mamlaka ya viwanja vya ndege Zanzibar, Hafsa Ali Mbaruk, amesema ujenzi huo umekuja kutokana na kukua kwa sekta ya usafiri wa anga pamoja na sekta ya utalii ambapo mamlaka imeona ipo haja ya kujenga kiwanja hicho ambacho kitaweza kutua helkopta ili kurahisisha usafiri.

Amesema uwanja huo utawanufaisha watalii na wananchi wanaotumia usafiri wa anga kwa njia ya Helkopta kutoka uwanja wa ndege wa Abeid Amani Karume hadi uwanja wa Paje

error: Content is protected !!