Category Archives: Kitaifa

Habari za ndani ya nchi

MAKATIBU WAKUU WATAKIWA KUWAPA MASHIRIKIANO MAAFISA WA MFUMO WA SEMA NA RAIS MWINYI

Makamu wa Pili wa Rais wa Zanzibar Mh. Hemed SuleimanAabdulla amewataka Makatibu Wakuu kuwapa mashirikiano Maafisa wa mfumo wa sema na Rais Mwinyi ili kusaidia kuyatolea ufumbuzi malalamiko ya Wananchi.

Mhe Hemed ametoa maelekezo hayo kupitia kikao maalum kilichowakutanisha Makatibu wakuu kilichojadili namna bora ya matumizi ya mfumo wa sema na Rais Mwinyi alipokutana nao   Ofisini kwake Vuga jijini Zanzibar.

Amesema kutokana na Makatibu Wakuu kuwa Watendaji wa wizara ni vyema  kutoa mashirikiano yakutosha kwa kuwa karibu na maafisa walioteuliwa kusimamia mfumo huo ili kuwasaidia katika utendaji wao.

Aidha Mhe makamu wa Pili wa Raisi amewakumbusha watendaji hao  kuwa na kawaida ya kufatilia mfumo huo ili kujua  maoni na malalamiko ya Wananchi yanavyoelekezwa katika idara zilizo Chini ya Wizara zao.

Akielezea kuhusu mfumo huo  Mhe. Hemed ameeleza  kwamba

kwa upande  wake Katibu Mkuu Kiongozi naKkatibu wa Baraza la Mapinduzi Injinia Zena Ahmed said amesema  utoaji wa Taarifa kuhusu muendelezo wa utatuzi wa malalamiko ya Wananchi ni moja ya njia za kutatua changamoto hizo.

Ameeleza kuwa kuna haja kwa watendaji wa Wizara na Wakuu wa Taasisi kutoa mrejesho kwa Wananchi juu ya changamoto wanazoziwasilisha kwani kufanya hivyo kutajenga imani kwa Wananchi juu ya Serikali yao inayongozwa na Rais Dk. Mwinyi.

Wakichangia mada katika kikao hicho makatibu wakuu  wamemuahidi Makamu wa pili wa Rais kwamba  watashirikiana vyema na wakuu wa Taasisi katika kuwasimamia maafisa wa mfumo huo kwa  kufahamu changamoto zao ili kutumia muda mfupi katika kuyatolea ufafanuzi malalamiko ya Wananchi.

Mapema makamu wa Pili Rais wa Zanzibar Mhe. Hemed Suleiman Abdulla alikutana na kufanya mazungumzo na maafisa wasimamizi wa mfumo huo kutoka katika idara mbali mbali na kuwataka wakasimamie vyema majukumu yao bila ya woga.

Kupitia kikao hicho maafisa hao wamemeueleza makamu wa pili wa Rais wa Zanzibar kuwa mfumo huo ni mzuri hasa kwa kuweza kuisadia Serikali katika kufahamu yaliyomo katika jamii na hata katika maeneo ya kazi pamoja na kuanisha baadhi ya changamoto zinazowakabili ikiwemo kukosekana kwa Rasilimali fedha kwa ajili ya kukidhi haja ya mawasiliano.

 

 

MH. OTHMAN MASOUD AMEAGIZA KUSITISHA MATUMIZI YA ENEO LA SHEHIA YA KIUNGANI NA BANDAKUU NUNGWI

Makamu wa kwanza wa Rais wa Zanzibar Mh. Othman Masoud Othman ameiagiza Uongozi wa Mkoa wa Kaskazini Unguja kusitisha Matumizi ya eneo la shehia ya kiungani na bandakuu nungwi ili kumaliza migogoro ya ardhi iliyopo katika maeneo hayo.

Ametoa Agizo hilo wakati wa ziara ndani ya mkoa huo katika kijiji cha Nungwi iliyokuja kufuatia malalamiko ya wananchi juu ya kutumiwa kwa maeneo hayo bila ya kuzingatia utaratibu.

Mh Othman amesema lengo la Serikali ni kuwaletea maendeleo Wananchi hivyo ni njema kwa Uongozi wa Mkoa kushirikiana na wizara ya Ardhi na wananchikupanga maeneo ya uwekezaji ili kuleta maendeleo ya Nchi.

Mkuu wa Mkoa wa kaskazini Unguja Mh Ayoub Mohamed Mahmoud amesema Mkoa huo una migogoro isiyopungua 150 na tayari 20 imeshatatuliwa huku akiwaomba Viongozi wa juu kuendelea kutembelea maeneo mbali mbali kwa lengo la kupatiwa ufumbuzi matatizo yanayowakabili Wananchi.

Katibu Mkuu Wizara ya Ardhi na Maendeleo ya Makaazi nd. Joseph John Kilangi amesema Wizara inaendeleza na utambuzi wa Ardhi katika maeneo hayo ili kuondosha matatizo ya Ardhi yaliyopo ndani ya Mkoa huo.

Wakati huo huo Mh Othman ameendelea na ziara yake kendwa Bondeni katika eneo linalotumika kwa shughuli za Uvuvi na kuwahakikishia Wananchi wa eneo hilo kuwa wataendelea kulitumia eneo hilo hadi serikali itakapoandaa utaratibu wa kuwatafutia eneo rafiki kwa kuendelea na shughuli zao za Maisha.

DK. HUSSEIN MWINYI AMEIPONGEZA SERIKALI YA INDIA ZA KUENDELEA KUIUNGA MKONO ZANZIBAR

Rais wa zanzibar na mwenyekiti wa baraza la mapinduzi dk. Hussein aali mwinyi amezipongeza juhudi za serikali ya india za kuendelea kuiunga mkono zanzibar katika kuimarisha sekta za kiuchumi na kijamii.

Wakati huo huo rais wa zanzibar amesema hatua ya kuunda serikali ya umoja wa kitaifa imelenga kuwawezesha wananchi kuishi kwa amani na utulivu na hivyo kuharakisha kasi ya kupata maendeleo.

Rais Dk Mwinyi aliyasema hayo leo Ikulu Jijini Zanzibar wakati alipokutana na kufanya mazungumzo na Balozi Mdogo wa India anayefanyia kazi zake hapa Zanzibar Bhagwant Singh.

Rais Dk. Mwinyi alisema kuwa Zanzibar inathamini sana uhusiano na ushirikiano wa kihistoria uliopo kati ya Zanzibar na India ambao umeipelekea nchi hiyo kuendelea kuiunga mkono Zanzibar katika kuendeleza miradi yake ya maendeleo.

Katika maelezo hayo, Rais Dk. Mwinyi alitumia fursa hiyo kuipongeza Serikali ya India kwa kuiunga mkono Zanzibar katika sekta ya afya, elimu, maji, kilimo, biashara, huduma za jamii, uendelezaji wa rasilimali watu na nyenginezo.

Aidha, Rais Dk. Mwinyi aliipongeza azma ya Serikali ya India ya ujenzi wa chuo cha amali huko kisiwani Pemba ambacho kitatoa mafunzo ya utalii pamoja na usarifu wa vyakula mbali mbali.

Alisema kuwa hatua hiyo itasaidia kwa kiasi kikubwa kutimiza malengo ya Serikali ya kukuza ajira kwa vijana pamoja na kuifanya Pemba kuwa ni sehemu maalum ya uekeza sambamba na kuweza kutoa mafunzo kwa vijana katika kuendeleza sekta maendeleo ikiwemo utalii.

Rais Dk. Mwinyi pia, alizipongeza juhudi za Serikali ya India za kuuunga mkono juhudi za Serikali ya Mapinduzi ya Zanzibar katika kuimarisha huduma za maji safi na salama.

Pia, Rais Dk. Mwinyi alizipongeza mashirikiano yaliopo kati ya Zanzibar na India katika kusaidia masuala tiba pamoja na kutoa nafasi za masomo kwa wanafunzi kutoka Zanzibar.

Sambamba na hayo, Rais Dk. Mwinyi alitumia fursa hiyo kuzikaribisha Kampuni binafsi za India kuzitumia fursa mbali mbali zilizopo hapa Zanzibar kwa kuja kuekeza.

Aliongeza kuwa Serikali ya Mapinduzi ya Zanzibar itatafuta namna bora ya kuzitumia hudumz a mikopo zinazotolewa na India kwa ajili ya kuendeleza miradi mbali mbali ya maendeleo hapa nchini.

Pamoja na hayo, Rais Dk. Mwinyi alimuhakikishia Balozi huyo kuwa Serikali ya Mapinduzi ya Zanzibar itaendeleza uhusiano na ushirikiano wa kihistoria uliopo baina ya pande mbili hizo.

Mapema Balozi Mdogo wa India anayefanyia kazi zake Zanzibar Bhagwant Singh aliupongeza uhusiano na ushirikiano wa muda mrefu uliopo kati ya India na Zanzibar na kusisitiza kwamba nchi yake itauendeleza kwa manufaa ya pande mbili hizo.

Balozi Singh alimpongeza Rais Dk. Mwinyi kwa kasi kubwa ya maendeleo sambamba na azma yake ya kuipaisha Zanzibar kiuchumi na kuahidi kwamba India itaendelea kuziunga mkono juhudi hizo.

Aidha, Balozi Singh alieleza kwamba nchi yake itaendea kutoa nafasi za masomo kwa Zanzibar zikiwemo zile za muda mfupi kwa watendaji wa Serikali kupitia Mpango wa India Technical and Economic Cooperation Program” (ITEC) na “International Forestic Science’(IFS).

 

WATAALAMU WA LUGHA YA KISWAHILI ZANZIBAR KUITUMIA LUGHA HIYO ILI KUISAIDIA NCHI KUINGIZA MAPATO

Makamu wa Pili wa Rais wa Zanzibar Mh. Hemed Suleiman Abdalla amewashauri Wataalamu wa L ugha ya Kiswahili Zanzibar kuitumia Lugha hiyo kama bidhaa ya kuisaidia Nchi kuingiza Mapato hasa katika Jumuiya za kikanda Afrika na Duniani kote.

Makamu wa Pili wa Rais wa Zanzibar akifungua Kongamano la Maadhimisho ya miaka 40 ya Jumuiya ya Nchi za Kusini mwa Afrika SADC lililoandaliwa kwa ushirikiano wa Wizara ya Mambo ya Nje ya Tanzania na cChuo Kikuu cha Taifa SUZA, amesema Kiswahili ni lugha inayokua kwa kasi hivyo Zanzibar ina nafasi nzuri ya kuliteka soko la Jumuiya hiyo kutokana na kuwa na Wataalamu mahiri wa Lugha hiyo.

Amesema Zanzibar ina Wahitimu wengi wa Kiswahili ambao hawana ajira hivyo ni fursa kwao kuchangamkia nafasi hiyo ikizingatiwa kuwa kiswahili ni Lugha ya nne inayozungumzwa katika Jumuiya ya SADC.

Ameliagiza baraza la Kiswahili Zanzibar Bakiza kuchukua Jukumu la kuhakikisha Kiswahili kinakua na kuimarishwa kwa Maslahi ya Nchi.

Aidha Makamu wa Pili amesema Zanzibar pia inaweza kutanua wigo wa kunufaika na kuwepo Jumuiya ya SADC,kuitekeleza kwa vitendo dhana ya Uchumi wa Buluu na imedhihirika kwa Wafanyabiashara wengi wa zanzibar kulitumia Soko la Kongo kusafirisha bidhaa ya Dagaa.

Waziri wa Elimu na Mafunzo ya Amali Mh. Simai Mohamed Said ameshauri kuwa na mkakati wa kuangalia ni eneo gani linaloweza kufanya vizuri zaidi katika Jumuiya ya SADC.

Mwakilishi wa Wizara ya Mambo ya nje Balozi Masoud balozi amesema kupitia SADC Zanzibar ijiandae kuibua fursa za kiuchumi na kibiashara huku Makamu Mkuu wa SUZA Dk. Zakia Mohamed Abubakar amesema Kongamano hilo litaendelea kuitambulisha suza kitaaluma kati yavyuo vikuu vilivyomo katika jumuiya ya SADC na kupewa heshima ya kuandaa Kongamano hilo miongoni mwa Vyuo vikuu Tanzania vikiwemo UDOM na Chuo cha Diplomasia.