Category Archives: Kitaifa

Habari za ndani ya nchi

WANANCHI WAMEISHUKURU SERIKALI KUTOKANA NA KUKAMILIKA KWA UJENZI WA BARABARA YA MWERA MAMBOSASA

Waziri wa Nchi, Ofisi ya Rais, Tawala za Mikoa, Serikali za Mitaa na Idara Maalum za SMZ Mh.Haji Omar Kheri Amesema kukamilika kwa Ujenzi wa Barabara ya Mwera Mambosasa  kutaendeleza  kuchangia  pato la Nchi.

Akizungumza katika Ukaguzi wa Barabara hiyo Mh.Kheri Amesema Barabara hiyo itasaidia kuimarisha shughuli za Biashara kwa Wananchi na kupelekea kuongeza pato la Nchi.

Aidha amewaomba Madereva wa Gari za Mizigo kutopitisha Gari zao yenye zaidi ya Tani kumi ili kudumu kwa muda Mrefu kwa Vizazi vya  sasa na baadae.

Wakaazi wa Eneo hilo Wamesifu juhudi zinazochukuliwa na Serikali ikiwemo Ujenzi wa Barabara hiyo na kusema kuwa itarahisisha Shughuli za Usafirishaji hasa Biashara ambapo itasaidia kuongeza Pato lao na Taifa.

Barabara hiyo ya Mwera Mambosasa ina Urefu wa Kilometa 3 Nukta 5 inajengwa na Serikali ya Mapinduzi Zanzibar

Kukamilika kwa Ujenzi wa Barabara hiyo yenye Urefu wa Kilometa 3.5 utachochea Shughuli za Kiuchumi na kutarahisisha Shughuli za Kimaendeleo Nchini.

 

MIUNDOMBINU IMARA KATIKA SEKTA YA ELIMU NDIO NJIA PEKEE INAYOWEZA KUZALISHA WASOMI WAZALENDO

Mgombea Urais wa Zanzibar kupitia Chama cha Mapinduzi CCM Dr. Hussein Ali Hassan Mwinyi amesema Miundombinu imara katika sekta ya Elimu ndio njia pekee inayoweza kuzalisha Wasomi wazalendo wanaokuwa nguzo imara katika kuimarisha Uchumi wa Taifa

Amesema Miundombinu hiyo ambayo huenda sambamba na kuwa na mitaala Mazingira bora Takwimu maslahi ya Walimu pamoja na gharama za kuhudmia Elimu ni mambo ya msingi yanayotosheleza haja ya kuwa na Wasomi wengi ambao ndio nguzo sahihi ya tegemeo la Taifa katika Maendeleo.

Dr. Hussein Ali Mwinyi alitoa kauli hiyo wakati wa Sherehe za kuwapongeza Wanafunzi wa kidato cha sita waliofaulu vyema Mitihani yao ya mwaka 2020 ufaulu utakaowawezesha kuendelea na masomo yao katika ngazi mbali ya Elimu ya juu hafla iliyofanyika katika hoteli ya verde mtoni pembezoni mwa jiji la Zanzibar.

Alisema Vijana ndio tegemeo kubwa la  Taifa hivyo ni lazima mazingira yao ya kupata Elimu kwa mujibu wa mategemeo ya fani tofauti yaendelezwe kwa nguvu zote ili kukidhi matihaji husika yanayojitokeza katika kuendesha Nchi.

Mgombe huyo wa Urais wa Zanzibar kupitia Chama cha Mapinduzi aliwapongeza vijana hao kutokana na ufaulu wao bora wa Mitihani ya kidato cha sita na kuwashauri wachague fani nzuri kipindi hichi ili pale wanapomaliza masomo yao waingie katika soko la Ajira mara moja.

Dr.  Hussein Mwinyi aliwaahidi Wasomi na Vijana wote wa Zanzibar kwamba endapo atapewa ridhaa ya kuwatumikia Wanbanchi wa Zanzibar katika nafasi ya Urais ataongeza mkazo zaidi ya ule atakaoukuta katika kuimarisha Elimu ya maandalizi, msingi, kati na Sekondari ili kuwanyooshea njia ya kuyakabili vyema masomo yao ya vyuo Vikuu hapo baadae.

Akitoa Taarifa mratibu wa Elimu Ajira na Mafunzo afisi kuu ya CCCM Kisiwandui Zanzibar Nd. Khamis Salum bdi alisema kitengo hicho kimekuwa na utaratibu wa kuwapongeza Vijana wanaomaliza Masomo ya kidato cha sita na kufaulu vyema kwa takriban mwaka wa nne tokea mwaka 2017.

Nd. Khamis alisema Wanafunzi mia moja waliopata daraja la kwanza, 503 daraja la pili na 769 daraja la tatu tayari wameshajisajili kwenye kitengo hicho ikionyesha wazi kuongezeka kwa kiwango cha ufaulu mwaka huu ikilinganishwa na miaka ya nyuma.

Alisema mfumo huo wa kujisajili kwa Wanafunzi hao mbali ya kuwaandaa kuimarisha uwezo wao wa kitaalum katika kupata Wataalamu wa uhakika Serikalini na hata sekta binafsi lakini pia kwa njia nyengine hupatiwa mfunzo ya uzalendo yanayosaidia kuendelea kuipenda Nchi yao.

Mratibu huyo wa Elimu Ajira na Mafunzo wa Afisi kuu ya CCM Kisiwandui kwa niaba ya wanataaluma wenzake wamempongeza dr. Hussein mwinyi kwa umahiri na uzalendo wake uliomuwezesha kuaminiwa na hatimae kupewa nafasi ya waziri wa ulinzi na jeshi la kujenga taifa kupitia marais waliopita wa muungano.

Katika sherehe hiyo pamoja na mambo mengine wasomi hao walipata semina ndogo iliyobeba dhana uzalendo, maisha ya chuo kikuu pamoja na msomi wa kimapinduzi na maendeleo ya taifa zilizotolewa na wahadhiri Mh. Angelina Malembeka, Dr. Haroun kutoka Chuo Kikuu cha Taifa {SUZA} na Mkuu wa Mkoa Kusini Mh. Ayoub Mohamed Mahmoud.

Akitoa shukrani kwa niaba ya wanafuynzi wenzake Mwanafunzi Abdulrahman Abdulla wa Chuo cha Biashara Zanzibar aliyefanikiwa kupata daraja la kwanza akiwa Mwanafunzi bora kwa mwaka huu Zanzibar {Zanzibar One} alisema mfumo wa Elimu uliopo Nchini ambao unapaswa kuimarishwa zaidi umemuwezesha kila Mtoto wa Zanzibar kupatataaluma  kulingana na uwezo wake.

 

 

 

 

 

 

 

 

WANDISHI WA HABARI KUACHA USHABIKI WA VYAMA VYA SIASA KATIKA KIPINDI UCHAGUZI MKUU

Baraza la Habari  Tanzania MCT limewakumbusha  Wandishi wa Habari  kuacha ushabiki wa  vyama vya siasa katika kipindi hiki cha kuelekea Uchaguzi Mkuu unaorajiwa kufanyika mwishoni mwa mwezi ujao.

Limesema watendaji hao wanapaswa kufanyakazi kwa mujibu wa maadili ya fani zao ili kuwafanya waaminiwe na wanaowaandikia habari zao pa,moja na Jamii kwa jumla.

Akizungumza katika mkutano  na watendaji hao

Mjumbe wa Bodi ya Baraza hilo ambae pia ni Mwenyekiti wa Kamati ya Maadili ya MCT Bwana Juxon Isaak akizungumza na Watendaji wa Shirika la Utangazaji ZBC hapa Karume House  amesema katika kuepuka makosa hayo yasijitokeze amewashauri waandishi wa  kuhakikisha wanafuata  Sheria za Nchi na miongozo yatume za  Uchaguzi.

Mjumbe wa  Kamati ta Maadili ya MCT na Mtangazaji  wa miaka mingi  Bi Edda Sanga  amewataka Wandishi wa Habari na Utangazaji kuipenda kwa dhati kazi hiyo ,kujielimisha zaidi pamoja  kukifanyia utafiti wanachokiandika au kukitangaza.

Naibu Mkurugenzi wa Shirika la Utangazaji Zanzibar Bi Nasra  Mohd Juma amewataka Wafanyakazi wa ZBC kujenga tabia ya kuipenda kazi yao  hiyo kwa kujituma bila ya kuvunjia moyo  sambamba na kujitafutia  mafunzo madogo  madogo ili kujeiweka katika nafasi nzuri  zaidi.

Ujumbe wa Baraza hilo ulipata nafasi ya kulitembelea  jengo hilo na  kuonyesha  kuridhishwa  na jinsi ya hatua  iliyofikia  baada ya kufanyiwa matengenezo makubwa katika sehemu zake za kurushia matangazo.

 

 

 

 

 

CHAMA CHA MAPINDUZI CCM KIMEZINDUA RASMI KAMPENI ZAKE ZANZIBAR

RAIS wa Zanzibar na Mwenyekiti wa Baraza la Mapinduzi ambaye pia ni Makamo Mwenyekiti wa CCM Zanzibar Dk. Ali Mohamed Shein amewataka wanaCCM pamoja na wananchi wote wa Zanzibar kumchagua Dk. Hussein Ali Hassan Mwinyi kuwa Rais wa Zanzibar kwani ana sifa zote wa Urais.

 Dk. Shein aliyasema hayo leo katika mkutano wa uzinduzi wa Kampeni za Chama Cha Mapinduzi (CCM), uliofanyika katika viwanja vya Kibandamaiti maarufu viwanja vya Demokrasia ambavyo vipo Jijini Zanzibar ndani ya Mkoa wa  Mjini Magharibi na kuhudhuriwa na mamia ya wanaCCM waliofurika katika viwanja hivyo.

Katika maelezo yake, Makamo Mwenyekiti huyo wa CCM Zanzibar alisema kuwa CCM imemchagua Dk. Hussein Mwinyi kuwa mgombea nafasi ya Urais kutokana na sifa zote za kuwa Rais hasa ikizingatiwa kuwa yeye si mwanagenzi wa siasa kwani amewahi kuwa kiongozi katika nyadhifa mbali mbali ndani ya Serikali ya Jamhuri ya Muungano wa Tanzania.

Alisema kuwa kutokana na uwezo alionao Dk. Hussein Mwinyi anauwezo mkubwa wa kuipaisha Zanzibar na kuleta maendeleo hasa pale akiendelea kushirikiana na mgombea Urais wa Jamhuri ya Muungano wa Tanzania Dk. John Pombe Magufuli pamoja na Mgombea wake Mwenza Mama Samia Suluhu Hassan na wagombea wengine wote wa chama hicho katika nafasi mbali mbali.

Rais Dk. Shein alieleza sifa mbali mbali za Dk. Hussein Mwinyi ikiwa ni pamoja na kuwa muungwana, mwenye heshima kwa wakubwa na wadogo, asiye na mbwembwe za uongozi na pia ni Daktari aliyebobea katika fani yake.

Aidha, alieleza kuwa Dk. Hussein ni mgombea nafasi ya Urais pekee ambaye atayalinda Mapinduzi ya Januari 12, 1964 pamoja na kuulinda Muungano wa Tanganyika na Zanzibar ambao umeleta mafanikio makubwa nchini.

Makamo Mwenyekiti huyo alitumia fursa hiyo kumuombea kura Dk. Hussein Mwinyi pamoja na  wagombea wengine wote wa CCM huku akitumia fursa hiyo kuwanadi wagombea Ubunge, Uwakilishi na Udiwani wa CCM wa Mkoa wa Mjini Kichama pamoja na kuwakabidhi Ilani ya chama hicho ili waende wakainadi.

Rais Dk. Shein alisema kuwa mikutano ya Kampeni ya Chama hicho itaendelea katika maeneo mengine mbali mbali katika Mikoa, Wilaya ya Zanzibar ikiwa ni pamoja na kuelekea Kisiwani Pemba.

Nae Mgombea Nafasi ya Urais wa Zanzibar kwa tiketi ya CCM Dk. Hussein Ali Hassan Mwinyi alieleza mafanikio yaliopatikana katika utekeleza wa Ilani ya Uchaguzi ya mwaka 2015-2020 chini ya uongozi wa Rais Dk. Shein na kuaahidi atayaendeleza katika Ilani ya uchaguzi ya mwaka 2020-2025 aliyokabidhiwa.

Hivyo, Dk. Hussein alieleza haja kwa wanaCCM na wananchi kukichagua chama hicho ili kuendeleza mafanikio hayo huku akieleza azma yake ya kuyaendeleza Mapinduzi pamoja na kuutunza na kuulinda Muungano wa Tanganyika na Zanzibar.

Aidha, alieleza azma yake pamoja na vipaumbele vyake iwapo atachaguliwa kuwa Rais wa Zanzibar ikiwa ni pamoja na kuiimarisha sekta ya uchumi wa bahari (bule economy), hasa uvuvi wa bahari kuu kwa lengo la kuinua ajira kwa vijana sambamba na kuimarisha pato la Taifa.

Pamoja na hayo, Dk. Hussein aliyaeleza mambo mengine atakayoyapa kipaumbele ikiwa ni pamoja na kuiimarisha sekta ya utalii, sekta ya uvuvi, viwanda ufugaji wa samaki, kuwasaidia wavuvi, kuimarisha sekta ya kilimo na sekta nyenginezo.

Dk. Hussein pia, alieleza kuwa atahakikisha katika kuendelea zoezi la upatikanaji wa mafuta na gesi atahakikisha mikataba itakayofungwa inawanufaisha wananchi wa Zanzibar sambamba na kuhakikisha Wazanzibari wanapata fursa kubwa ya ajira katika sekta hiyo.

Alieleza kuwa katika kuhakikisha uchumi unaimarika ni lazima miundombinu ya barabara, bandari na uwanja wa ndege yote hiyo inaimarisha pamoja na kuhakikisha vinapatikana vyanzo vipya vya umeme kazi ambayo ataiendeleza kwa lengo la kukuza uchumi na maendeleo ya Zanzibar.

Sambamba na hayo alieleza azma yake ya kuimarisha huduma za jamii zikiwemo elimu bora bila ya malipo hadi Sekondari, kuongeza ufaulu kwa wanafunzi na kupitia upya mitaala ya elimu ikiwemo elimu ya ufundi ili vijana waweze kujiajiri wenyewe, kuongeza udahili, fedha kwa wanafunzi vyuoni huduma za afya kuanzia msingi hadi Rufaa, kukuza bajeti ya afya, maji safi na salama.

Sekta ya kilimo, kikiwemo kilimo cha biashara na chakula vyote ataviimarisha  sambamba na kuviendeleza na kuanzisha viwanda vikiwemo vya kusindika.

Pia, alitoa pongezi kwa Rais Dk. Shein kwa kusimamia amani na utulivu huku akiahidi na  yeye kwa upande wake iwapo atachaguliwa kuwa Rais wa Zanzibar ataiendeleza kwani anatambua umuhimu wake kwa maendeleo ya jamii na taifa kwa jumla.

Dk. Hussein aligusia suala zima la utawala bora katika kukuza uchumi na kusisitiza suala zima la uwajibikaji na kueleza kuwa hatowavumilia wale wote waliokuwa hawawajibiki na kuhakikisha kwamba watu hawatofanya kazi kwa mazoea.

Mapema Naibu Katibu wa CCM Zanzibar Abdalla Juma Mabodi alieleza kuwa Dk. Hussein Mwinyi ana uwezo mkubwa wa kuuinua na kuuendeleza uchumi wa Zanzibar.

Aidha, alieleza kuwa uwezo alionao Dk. Hussein Mwinyi katika kusimamia amani na utulivu pamoja na Muungano ni mkubwa sana hasa ikizingatia historia yake ya uongozi wake ndani ya Jamhuri ya Muungano wa Tanzania.

Mkutano huo ulikwenda sambamba na burudani kutoka kwa wasanii mbali mbali wa ndani ya nje ya Zanzibar wakiongozwa na msanii nguli Bongo Flava Ali Kiba pamoja na mwana dada anaeinukia katika miondoko hiyo Zuhura Othman Soud (Zuchu) wakiungana na wasanii wa Bongo Movie na makundi mengine kadhaa ya wasanii.

Viongozi mbali mbali wa CCM walihudhuria akiwemo Makamo wa Rais wa Jamhuri ya Muunganow a Tanzania, Mama Samia Suluhu Hassan, Makamo wa Pili wa Rais wa Zanzibar Balozi Seif Ali Idd pamoja na viongozi wengine wastaafu akiawemo Rais Mstaafu Ali Hassan Mwiny, Rais Mstaafu wa Zanzibar Dk. Amani Abeid Karume, Makamo wa Rais Mstaafu Dk. Mohamed Kharib Bilali na viongozi wengine wa CCM kutoka Tanzania Bara.

error: Content is protected !!