Category Archives: Kitaifa

Habari za ndani ya nchi

KIWANDA CHA NGUO BASRA TEXTILEMILLS ZANZIBAR

RAIS wa Zanzibar na Mwenyekiti wa Baraza la Mapinduzi Dk. Ali Mohamed Shein amewataka madaktari na wauguzi pamoja na watoa huduma za afya hapa nchini kuipenda kazi yao, kuwa na huruma, kuwa wastahamilivu na wenye kufuata maadili ya kazi yao.

Dk. Shein aliyasema hayo leo katika uzinduzi wa jengo la Mama na Mtoto katika hospitali ya Wilaya Kivunge, Mkoa wa Kaskazini Unguja, ambapo viongozi kadhaa walihudhuria akiwemo Naibu Spika wa Baraza la Wawakilishi Mgeni Hassan Juma, Mawaziri, Manaibu Mawaziri, Katibu Mkuu wa Baraza la Mapinduzi na Katibu Mkuu Kiongozi Dk. Abdulhamid Yahya Mzee pamoja na viongozi wengine wa Serikali, vyama vya siasa na wananchi.

Katika maelezo yake, Rais Dk. Shein aliutaka uongozi wa Wizara hiyo kuhakikisha suala la kufuata na kutii maadili ya kazi hiyo linazingatiwa wakati wote na isitokezee kuona jambo la kawaida kwa daktari kutoa lugha isiyofaa kwa wananchi wanaofuata huduma hospitalini..

Aidha, Rais Dk. Shein alisema kuwa jukumu la Serikali ni kuhakikisha kwamba mipango yote iliyopangwa katika kuimarisha sekta ya afya inatekelezwa kwa ufanisi pamoja na huduma zinazotolewa katika hospitali na vituo vya afya zinakidhi mahitaji kwa wananchi.

Ambapo pia, Rais Dk. Shein alitumia fursa hiyo kuiikemea tabia ya Idara ya Upasuaji wa mifupa katika hospitali ya MnaziMmoja ya kuwatolesha wananchi pesa kwa ajili ya  kununulia dawa ama vifaa tiba kwani tayari Serikali imetangaza kuwa matibabu bure hivyo, Idara hiyo inaharibu dhana hiyo.

Kutokana na hali hiyo aliutaka uongozi wa Wizara ya Afya kulitafutia ufumbuzi wa haraka suala hilo na Idara hiyo ishughulikiwe kama zinavyoshughulikiwa Idara nyengine hasa ikizingatiwa kwamba suala la dawa si tatizo kwani Serikali ya Mapinduzi ya Zanzibar imekuwa ikitoa fedha nyingi kwa ajili ya kununulia dawa.

Aliongeza kuwa ndio maana Serikali imekuwa ikiongeza bejeti ya Wizara ya Afya kila mwaka pamoja na bajeti ya kununulia dawa ili kuondosha changamoto zilizokuwepo hapo kabla ambapo bajeti ya Wizara hiyo imeongezeka kutoka TZS bilioni 10.81 mwaka 2010/2011 hadi kufikia TZS bilioni 104.24 mwaka 2019/2020.

Alieleza kuwa bajeti ya kununulia dawa imeongezeka kutoka TZS bilioni 7.0 mwaka 2017/2018 hadi kufikia TZS bilioni 17.7 mwaka 2020/2021 ambapo kiwango hicho sawa na ongezeko la asilimia 152 ya bajeti ya dawa ya mwaka 2017/2018.

Kutokana na mafanikio hayo, Rais Dk. Shein alisema kuwa wananchi wanathamini juhudi hizi na wanafurahi kuona kwamba dawa nyingi zinapatikana katika hospitali za hapa nchini na zinatolewa bure hivi sasa.

Pamoja na hayo, Rais Dk. Shein alisema kuwa kuwepo kwa jengo hilo kubwa la ghorofa mbili na miundombinu bora ya barabara kutazidi kuziimarisha huduma za mama na mtoto pamoja na huduma nyengine zinazotolewa katika hospitali hiyo.

Alieleza kuwa kupandishwa daraja kwa hospitali hiyo kunatokana na wazo la ASP tangu mwaka 1963 na baada ya hapo iliendelea kupandishwa hadhi kutokana na hadhi na maendeleo ya hapo baadae huku akieleza kuwa mabadiliko hayo ni utekelezaji wa dhamira ya Waasisi wa Mapinduzi Matukufu ya Zanzibar ya mwaka 1964 ya kutoa huduma za afya bora na bure kwa wananchi wote wa Zanzibar na kwa msingi wa usawa.

Sambamba na hayo, Rais Dk, Shein alieleza kuwa mafanikio yaliyopatikana katika hospitali ya Wilaya ya Kivunge na ile ya Makunduchi yamechangiwa na viongozi na watendaji wa Mradi wa Uimarishaji wa huduma za Afya Zanzibar (Health Imrovement Project Zanzibar-HIPZ) na kutumia fursa hiyo kumpongeza Dk Ru MackDonagh kutoka Uiengereza na viongozi wa Wizara ya Afya kwa masihrikiano yao katika kufanikisha mradi huo.

Aliongeza kuwa miongoni mwa mafanikio hayo yaliyopatikana katika mradi huo wa HIPZ ni kuweza kutoa na kuendelea kuziimarisha huduma za mama na mtoto ambapo mafanikio hayo yako wazi kwa wananchi wote wanaotumia hospitali hizo.

Alieleza kuwa takwimu zinaonesha kuwa katika mwaka wa fedha 2019/2020 jumla ya kina mama 5091 wamejifungulia Hospitali ikilinganishwa  na kina mama 2025 waliojifungulia hapa katika mwaka 2014/2015.

Alieleza kuwa Hospitali hiyo imeweza kupunguza wagonjwa wanaopelekwa Mnazi Mmoja kwa ajili ya matibabu zaidi hasa upasuaji wa mama wajawazito kutoka kumi kwa mwezi hadi watano.

Alieleza kuwa juhudi za makusudi zimechukuliwa na Serikali ya Awamu ya Saba na Awamu zote zilizopita katika kuhakikisha huduma za afya zinaimarika na Serikali hivi sasa imepata nguvu kufundisha madaktari wengine hatua ambayo pia, imesaidia kuongezeka kwa madaktari.

Alieleza kuwa ujenzi wa miundombinu ya barabara iliyo bora imesaidia katika kuimarisha sekta ya afya katika hospitali ya Wilaya Kivunge  na kuwawezesha wananchi wote wa Wilaya ya Kaskazini A, na Wilaya nyengine kufuata huduma zinazotolewa hospitalini hapo kwa urahisi.

Rais Dk. Shein pia, alieleza kuwa Serikali imeweza kupiga hatua kubwa katika kuendeleza sekta ya afya ndani ya miaka mitano kama ilivyotakiwa katika Ilani ya Uchaguzi Mkuu ya CCM ya mwaka 2015-2020 Ibara ya 102 (c) ikiwa ni pamoja na kuhakikisha hospitali ya Makunduchi na Kivunge zinafikia daraja na kiwango cha hospitali za Wilaya.

Rais Dk. Shein alitoa nasaha zake na kuwataka wananchi kuwachagua viongozi wenye sifa kutoka CCM na kutowachagua viongozi ving’ang’anizi ili huduma za afya ziendelee kama ilivyofanya Awamu zote huku akiwataka kuimarisha amani,umoja na utulivu kwa lengo la kuleta maendeleo.

Waziri wa Wizara ya Afya Hamad Rashid Mohammed  alitumia fursa hiyo kumpongeza Rais Dk. Shein kwa mafanikio makubwa yaliopatikana katika sekta ya afya.

Nae Naibu Katibu Mkuu wa Wizara hiyo Halima Maulid Salum alieleza kuwa jengo hilo limejengwa na Kampuni ya Worlrd Class Engineerring Company Limited (WCEC Limited) kwa gharama ya TZS Bilioni 4 ambapo TZS bilioni 3.6 zimetolewa na Serikali ya Mapinduzi ya Zanzibar na milioni 400 zimetolewa na UNFPA kupitia Mradi wa Afya Bora.

Alisema kuwa lengo kuu la ujenzi wa jengo hilo ni kutoa huduma bora za afya kwa wananchi ili kupunguza vifo vya akinamama vinavyotokana na uzazi ambapo  mwanzo Hospitali ya Kivunge ilikuwa na vitanda 72 na hivi sasa jengo jipya la Mama na Mtoto pekee linauwezo wa vitanda 140 na kufanya jumla ya vitanda vya hospitali hiyo kufikia 212.

Alieleza kuwa jengo hilo lina ghorofa mbili ambapo sehemu ya chini ina wodi 4, wodi ya kwanza ya kinamama kabla ya kujifungua, wodi ya pili za kinamama baada ya kujifungua na wodi ya uangalizi baada ya upasuaaji.

Aidha alisema kuwa vipo vyumba vitano vya kujifungulia, vyumba vya wauguzi viwili, vyumba vya Daktari viwili na sehemu ya mapokezi ambapo pia ghorofa ya kwanza ni maalum kwa ajili ya watoto walio chini ya miaka mitano yenye wodi tano ambazo ni wodi ya watoto wachanga, wodi ya kangaroo, chumba cha Wagonjwa mahututi (ICU), na vyumba viwili kwa ajili ya kliniki.

Ghorofa ya pili ina wodi sita kwa ajili ya wanawake wenye matatizo yanayohusiana na uja uzito na ukumbi wa mkutano ambapo pia, Hospitali hiyo imeongeza madaktari kutoka 10 mwaka 2015 hadi 22, wauguzi 85 kutoka 52 na Anastersia 5, Daktari Bingwa wa wanawake mmoja, Daktari Bingwa wa watoto mmoja. Radioslogist wanne na wahuhudumu wa afya 35 kutoka 23.

Mapema Mwakilishi wa UNFPA Peter Matinga alitoa pongezi kwa uongozi wa Serikali ya Mapinduzi ya Zanzibar kwa juhudi zake kubwa za kuendelea kuimarisha sekta ya afya na kuahidi kuwa Shirika hilo la Umoja wa Mataifa litaendelea kuiunga mkono Zanzibar katika sekta ya afya.

JAMII NA KUWEZA KUWACHAGUA WANAWAKE KATIKA NAFASI MBALIMBALI ZA UONGOZI

Chama cha Waandishi wa Habari Wanawake Tanzania Tamwa kwa upande wa Zanzibar kimeridhia Ripoti ya taarifa iliyotolewa na Wanaharakati, Wanaume wa mabadiliko pamoja na Viongozi wa dini kuhusu kuhamasisha Wanawake kushika nafasi mbalimbali  za Uongozi kupitia Uchaguzi Mkuu wa Mwaka 2020.

Akizungumzakatika uwasilishaji wa Ripoti hiyo Afisa miradi kutoka TAMWA nd. sabrina  yussuf amesema mafanikio hayo yameweza  kupiga hatua kwa jamii na kuweza kuwachagua wanawake katika nafasi mbalimbali ya uongozi.

Hata hivyo amezipongeza kamati hizo kwa  juhudi zao za kuelimisha jamii mjini na vijijini kwa vile kuna baadhi ya mambo yanahitajika kusemewa na wanawake wenyewe katika vyombo vya kutunga sheria.

Nao wanaume haowa mabadiliko wakielezea namna harakati hizo zilivyofanikiwa wamesema wamefanikiwa kuondosha mfumo dume uliozoeleka ndani ya jamii ya kuwa mwanamke hana uwezo wa kuongoza.

DKT SHEIN AMEAGANA NA WATENDAJI ALIOWATEUA SERIKALINI

Rais wa Zanzibar na Mwenyekiti wa Baraza la Mapinduzi Dkt Ali Mohamed Shein ameagana na watendaji aliowateua katika nyadhifa mbali mbali Serikalini na kusema kwamba hafla hiyo ni kielelezo cha mafanikio katika kuendeleza na kudumisha Demokrasia na utawala bora Nchini.

 Dk. Shein aliyasema hayo leo huko katika viwanja vya Ikulu jijini Zanzibar katika hotuba ya kuagana na Watendaji aliowateua katika nyadhifa mbali mbali  katika Serikali ya Mapinduzi ya Zanzibar.

Rais Dk. Shein alisema kuwa kuwepo kwa mfumo mzuri wa kisheria wa kubadilishana, kupokezana na kuacha madaraka ni miongoni mwa mambo yaliyoipatia sifa Jamhuri ya Muungano wa Tanzania na Zanzibar duniani kote.

Alisema kuwa viongozi wa Tanzania wamejijengea sifa ya kuacha, kukamilisha na kupokezana madaraka  kwa nafasi mbali mbali kwa hali ya salama na utulivu.

Aliongeza kuwa suala la kubadilishana madaraka au kuachia kwa hiari ili kutoa nafasi kwa wengine katika ngazi mbali mbali ni utamaduni uliojengeka hata kwa chama chake cha Mapinduzi (CCM).

Rais Dk. Shein alisema kuwa viongozi wote hao akiwemo yeye mwenyewe wanawajibika kwa wananchi wa Zanzibar kwani Serikali ya Mapinduzi ya Zanzibar ni yao hivyo alisisitiza haja ya kuwatumikia wananchi iapsavyo.

Alieleza kuwa jambo ambalo amekuwa akilisisitiza kwa kipindi chote cha miaka 10 ya uongozi wake ni kuwataka watumishi wa umma wafahamu jukumu lao kubwa la kutoa huduma kwa wananchi.

Alisema kuwa Serikali ya Mapinduzi ya Zanzibar, Awamu ya Saba imefanikiwa kwa kiasi kikubwa kutokana na mipango iliyopangwa ya Maendeleo ikiwa ni pamoja na mafanikio ya Dira ya Maendeleo 2020, Mipango ya Kimaendeleo ya Kimataifa.

Alisema kuwa kasi ya maendeleo iliyofanywa na Awamu ya Saba imetokana na kasi za Awamu zilizopita ambapo mafanikio yameweza kupatikana ikiwa ni pamoja na kuimarika kwa uchumi kwa asilimia 7.

Alieleza kuwa ndani ya miaka 10, Sheria 128 zimetungwa na kuwa Sheria za Zanzibar jambo ambalo ni mafanikio makubwa kwa Zanzibar ambapo katika Sheria hizo mbili miongoni mwao ni Sheria ya Kupambana na Rushwa na Uhujumu Uchumi na ile Sheria ya Maadili ya Uongozi wa Umma.

Rais Dk. Shein akinukuu Katiba ya Zanzibar ya mwaka 1984 kwenye Ibara ya 28 kifungu cha 3, ambacho kinasema kwamba “Bila ya kuathiri chochote kilichomo katika kifungu hiki cha Katiba hii hakutakuwa na mtu yoyote ataechaguliwa kuwa Rais wa Zanzibar kwa zaidi ya vipindi viwili vya miaka mitano kila kimoja”.

Alitoa pongezi kwa Watendaji wote aliowateua kwa kufanya kazi vizuri na kuweza kuwasaidia wananchi na kusema kuwa anathamini juhudi zao hizo zilizopelekea Zanzibar kupata mafanikio.

Rais Dk. Shein alieleza kuwa mara nyingi inapofanywa safari jambo la kwanza linaloombwa ni  kujaalia safari ya salama na inapofikwa safari hiyo jambo linalofuata ni kutoa shukurani kwa kufika salama na kusema kuwa safari ya miaka 10 ni ndefu.

Alisema kuwa shughuli hiyo ya kuagana inatoa furaha kubwa akikumbuka kwamba anawaaga watendaji hao wakiwa wamefanya mambo mengi mazuri kwa pamoja kwa ajili ya kuwatumikia wananchi.

Aidha, alisema kuwa shughuli hiyo inatoa fursa ya kuyatathmini maisha yao pamoja na kazi mbali mbali walizozifanya pamoja kwa kipindi cha miaka 10 ya uongozi wa Rais Dk. Shein.

Rais Dk. Shein alisema kuwa baadhi ya wakati nyoyo hugubikwa na machungu, hasa kama watu wanaoagana waliishi vizuri na walipendana.

“Hali hii imeelezwa vizuri na Malenga wa Kiengereza, Bibi Mary Ann Evans, pale aliposema ‘Only in the agony of parting do we look into the depths of love’ akiwa na maana tunapokumbwa na machungu ya kuagana, ndipo hasa tunapofikiria ukubwa wa mapenzi yaliyokuwepo”,alisema Dk. Shein.

Aidha, Rais Dk. Shein alisema kuwa Zanzibar inapendwa sana kwa sababu Zanzibar ni salama na watu wake ni wakarimu sana na jina lake linajiuza kwa kiasi kikubwa kwa watalii na kusisitiza haja ya kuongeza nguvu katika sekta hiyo.

Sambamba na hayo, Rais Dk. Shein alitoa pongezi kwa Rais wa Jamhuri ya Muungano wa Tanzania John Pombe Joseph Magufuli kwa kushirikiana nae katika uongozi wake wote pamoja na kuyalinda na kuyadumisha Mapinduzi sambamba na kuudumisha Muungano.

Alisema kuwa katika Rais yeyote atakaetoka Jamhuri ya Muungano wa Tanzania au Rais wa Zanzibar basi ataheshimu Mapinduzi na ataheshimu Muungano na kueleza imani yake kwamba Rais bora atatoka CCM.

Dk. Shein alitumia fursa hiyo kuwashukuru viongozi wote wa SMZ na SMT pamoja na viongozi wastaafu wakiwemo Marais wa Wastaafu wa Zanzibar na Jamhuri ya Muungano wa Tanzania na Serikali ya Mapinduzi ya Zanzibar na  watendaji wengine wote akiwemo Makamo wa Pili wa Rais Balozi Seif Ali Idd na viongozi wengine.

Aliwapongeza viongozi wote wa CCM kwa kumpa heshima katika uongozi wake wote na kuwashukuru viongozi wote aliofanya kazi nao huku akimshukuru Marehemu Mzee Mkapa kwa kumteua kuwa Makamo wa Rais mara tu baada ya kutokea kifo cha Dk. Omar Ali Juma sambamba na kufanya kazi nae kwa mashirikiano makubwa.

Aidha, alimpongeza Mama Mwanamwema Shein kwa kumvumilia, kumliwaza na kumpa maneno mazuri  kwa kipindi chote cha takriban miaka 20 ya uongozi katika Jamhuri ya Muungano wa Tanzania na Serikali ya Mapinduzi ya Zanzibar.

Nae Makamo wa Pili wa Rais wa Zanzibar Balozi Seif Ali Idd, alitoa shukurani kwa rais Dk. Shein kwa kushirikiana nae pamoja na imani kubwa aliyonayo kwake na kutoa shukurani kwa Mawaziri kwa kushirikiana katika kutatua changamoto mbali mbali.

Mapema Katibu wa Baraza la Mapinduzi na Katibu Mkuu Kiongozi Dk. Abdulhamid Yahya Mzee alitoa shukurani kwa Rais Dk. Shein kutokana na mambo mengi aliyowafanyia watendaji hao pamoja na wananchi kwa ujumla.

Alisema kuwa watumishi Serikalini wako wengi lakini ameweza kutoa nafasi kwa watendaji hao aliowateua hiyo ikionesha wazi kwamba anawaamini.

Alifahamisha kuwa katika kipindi chake cha uongozi Rais Dk. Shein amefanya mambo mengi yakiwemo kuimarisha miundombinu ya barabara, usafiri na usafirishaji, nyumba, ofisi, pencheni jamii kwa wazee, kuongeza mshahar kwa watumishi wa umma, sekta ya afya, elimu, kilimo, biashara uvuvi, ufugaji na nyenginezo.

Alimpongeza kwa kuimarisha utawala bora, na kupunguza manunguniko kwa wananchi sambamba na watendaji kujifunza has mfumo aliouanzisha wa “Bangokitita” na kuongeza mshahara kwa asilimia 100, kuanzisha taasisi mpya, wafanyakazi kupata nafasi za kusoma ndani na nje ya nchi, kujifunza staili yake ya kufanya kazi kwa utulivu, umakini, usikivu pamoja na kujifunza kutoka kwake kwamba kiongozi lazima ajiamini.

Alimpongeza Rais Dk. Shein kwa ujasiri wake hasa pale alipotangaza elimu bure pamoja na huduma zote za afya zitolewe bure kwa wananchi, kuongeza kiwango cha chini cha mshahara kutoka 150,000 hadi 300,000.

Alisema kuwa Rais Dk. Shein anamaliza uongozi wake akiwa anawaachia wananchi zawadi kubwa ya amani, utulivu, umoja na mshikamano na kuahidi kuwa tunu hiyo itaendelezwa na kutunzwa.

Nao Mawaziri wote wa Serikali ya Mapinduzi ya Zanzibar walipata fursa ya kueleza kwa ufupi mafanikio ya Wizara zao sambamba na kuwakabidhi zawadi mbali mbali Rais Dk. Shein pamoja na Mama Mwanamwema Shein.

Sambamba na hayo, Mawaziri wawili Wasiokuwa na Wizara Maalum ambao wanatoka kambi ya Upinzani walipata nafasi ya kutoa shukurani zao huku wakimpongeza Rais Dk. Shein kwa kuwateua kuwa Mawaziri jambo ambalo limemjengea sifa kubwa Dk. Shein sambamba kusisitiza haja ya kuilinda na kuidumisha amani iliyopo.

MATENGENEZO NA UTANUZI WA VIWANJA VINNE VYA NDEGE

Serikali ya Jamhuri ya Muungano wa Tanzania imezindua Mradi wa Ujenzi, Matengenezo pamoja na Utanuzi wa Viwanja vinne vya Ndege vya Shinyanga, Tabora, Sumbawanga na Kigoma ili viwe na kiwango cha Kimataifa, utakaogharimu zaidi ya Shilingi Bilioni mia moja.

Akizindua Ujenzi wa mradi huo Jijini Dar es salaam, Katibu Mkuu wa Wizara ya Fedha na Mipango, Bw. Doto James, amesema kuwa Fedha hizo zimetolewa kama Mkopo wenye Masharti nafuu na Benki ya uwekezaji ya Ulaya kwa ajili ya kuboresha huduma za usafiri na usafirishaji wa Abiria katika maeneo hayo ya kimkakati.

Aidha Doto amewataka Wakandarasi wa Miradi hiyo kutekeleza kwa mujibu wa makubaliano huko akimuagiza Mtendaji mkuu wa wakala wa Barabara Tanzania-Tanroads, Mhandisi Patrick Mfugale, kusimamia kwa karibu Ujenzi wa Mradi hiyo.

Kwa upande wake Mtendaji mkuu wa wakala wa Barabara Tanzania-Tanroads, Mhandisi Patrick Mfugale, amesema Ujenzi wa Viwanja hivyo utahusisha upanuzi wa njia za kurukia Ndege, Majengo ya Abiria, Barabara za Lami za kuingia Uwanjani na Ujenzi wa Maegesho ya Magar

Akizungumza kwa niaba ya wakuu wa Mikoa ambako Miradi inaenda kutekelezwa Katibu Tawala wa Mkoa wa Kigoma nd. Rashidi Mchata, amesema ukamilishaji wa Miradi hiyo utasaidia kuunganisha shughuli za Uchumi katika Mikoa ya pembezoni ya Nchi.

Utekelezaji wa Miradi hiyo ni mwendelezo wa Serikali ya Awamu ya Tano chini ya Rais Dkt John Pombe Magufuli na ile ya Awamu ya saba ya Serikali ya Mapinduzi ya Zanzibar Chini Rais Dr. Alli Mohed Shein ya kuboresha usafiri wa Anga Nchi.

 

error: Content is protected !!