Recent Posts by asha

RAIS SHEIN AMEFANYA MAZUNGUMZO NA MTAWALA WA RAS-AL-KHAIMAH

Mazungumzo hayo yaliofanyika katika makaazi ya Sheikh Saud  Bin Saqr Al Qasimi mjini Ras-Al-Khaimah, ambapo kiongozi huyo wa Ras- al Khaimah  alimuhakikishia Rais Dk. Shein kuwa yuko tayari kuisaidia Zanzibar katika kuimarisha sekta ya elimu.

Sheikh Saud Bin Saqr Al Qasimi alieleza kuwa Ras-al Khaimah imepiga hatua nzuri katika kuimarisha sekta ya elimu hasa elimu ya juu hivyo, ipo tayari kutoa fursa kwa walimu wa Zanzibar kwenda nchini humo kujifunza katika vyuo vikuu vilivyopo.

Aliongeza kuwa hatua hiyo itasaidia zaidi kutoa nafasi kwa walimu wengi waliopo Zanzibar kupata mafunzo ambayo watawasaidia na walimu wengine sambamba na kuongeza ufaulu kwa wanafunzi hasa wale wanaosomaelimu juu.

Alieleza kuwa programu hiyo ya kutoa mafunzo na kuwajengea uwezo walimu kutoka Zanzibar itakuwa ya kila mwaka na itadhaminiwa na Serikali ya Ras Al Khaimah.

Aidha, kiongozi huyo alieleza kuwa programu hiyo itajikita zaidi katika masomo ya Sayansi hali ambayo itasaidia kuendeleza masomo hayo sambamba na kuimarisha sekta ya elimu hasa katika karne hii iliyopo.

Katika mazungumzo hayo, viongozi hao walieleza kuwa Zanzibar na Ras-al. Khaimah zina mambo mengi yanayofanana kwa hivyo kuna haja kubwa ya kuimarisha uhusiano na ushirikiano wa kihistoria uliopo.

Pamoja na hayo, kiongozi huyo wa Ras Al Khaimah alimueleza Rais Dk. Shein azma ya nchi yake kuendelea kuiunga mkono Zanzibar katika kuendeleza sekta mbali mbali za maendeleo zikiwemo za kiuchumi na kijamii.

Alieleza kuwa nchi yake inathamani uhusiano na ushirikiano huo uliopo na kuahidi kuwa itaendelea kuweka mikakati madhubuti katika kuhakikisha mashirikianao katika sekta za maendeleo yanadumishwa baina ya pande mbili hizo.

Kiongozi huyo wa Ras Al Khaimah alizipongeza juhudi za Rais Dk. Shein na kuahidi kuziunga mkono kwani anaona jinsi anavyofuatilia kwa karibu uimarishaji wa sekta za maendeleo kwa manufaa ya Zanzibar na watu wake.

Nae Rais wa Zanzibar na Mwenyekiti wa Baraza la Mapinduzi Dk. Ali Mohamed Shein, katika maelezo yake, alitoa shukrani kwa kiongozi huyo kutokana na juhudi zake za kuendelea kuiunga mkono Zanzibar na kumpongeza kwa azma yake hiyo ya kuiunga mkono sekta ya elimu Zanzibar.

Rais Dk. Shein alimueleza kiongozi huyo kuwa Zanzibar ina mengi ya kujifunza kutoka kwa ndugu zao wa Ras Al Khaimah na iko tayari kupanua wigo wa maendeleo kutoka nchini humo kwani inatambua mafanikio yaliopatikana kutokana na mikakati iliyowekwa katika sekta mbali mbali za maendeleo ikiwemo sekta ya elimu.

Pamoja na hayo, viongozi hao kwa pamoja walizungumzia hatua zaidi zinazohitajika katika kuimarisha ushirikiano kati ya Zanzibar na Ras Al Khaimah katika sekta za maendeleo ikiwa ni pamoja na kupanga mipango madhubuti katika malengo yaliokusudiwa ya hapo baadae.

Rais Dk. Shein alitumia fursa hiyo kumpongeza Sheikh Al Qasimi na kueleza kuwa programu hiyo ambayo amekusudia kuiunga mkono itasaidia kuimarisha juhudi za Serikali ya Mapinduzi ya Zanzibar inazoendelea kuzichukua katika kukuza sekta hiyo.

Aidha, Rais Dk. Shein alimueleza kiongozi huyo kuwa tayari Serikali ya Mapinduzi ya Zanzibar imepiga hatua katika kuimarisha elimu ya msingi na Sekondari hivyo hatua hiyo ya Serikali ya Ras Al Khaimah itasaidia kuimarisha elimu ya juu sambamba na kuongeza idadi ya wataalamu katika fani mbali mbali.

VIKAO VINANE VYA KUSHUGHULIKIA KERO ZA MUUNGANO HUFANYIKA KATIKA KIPINDI CHA MWAKA MMOJA

Kiasi ya vikao vinane vya kushughulikia kero za muungano hufanyika katika kipindi cha mwaka mmoja ili kutafuta suluhisho la kero hizo kwa upande wa jamhuri ya muungano na wa Zanzibar.

Akijibu suali katika kikao cha baraza la wawakilishi naibu Waziri wa nchi ofisi ya makamu wa pili wa Rais Mh Mihayo Juma Nhunga amesema vikao hivyo pia huongezeka pale inapoonekana kuna umuhimu wa kufanya hivyo.

Wakati huo huo wizara ya ardhi, nyumba, maji na nishati imesema vijiji vyote vikubwa vimeshasambaziwa huduma za umeme na vilivyobaki ni vitongoji pamoja na maeneo mapya

Akijibu suala katika kikao cha baraza la wawakilishi kinachoendelea naibu waziri wa wizara hiyo Mh Juma Makungu amesema kwa sasa shirika la umeme linaendelea kuyafanyia kazi maeneo hayo ili kupatiwa huduma hiyo muhimu

SMZ INAENDELEA KUCHUKUA JUHUDI ZA KUDHIBITI UINGIAJI NA MATUMIZI YA DAWA ZA KULEVYA

Serikali imesema inaendelea kuchukua juhudi mbali mbali za kudhibiti uingiaji na matumizi ya dawa za kulevya kwa kupambana na watumiaji na wasambazaji wa dawa hizo.

Akiwasilisha ripoti ya kamati ya kusimamia ofisi za viongozi wakuu wa kitaifa kuhusu utekelezaji wa maagizo ya kamati kwa ofisi ya makamu wa pili wa Rais mwenyekiti wa kamati hiyo Mh Panya Ali Abdallah amesema miongoni mwa juhudi hizo ni kutoa elimu na kuwafikia wananchi wa maeneo tofauti

Makamu mwenyekiti wa kamati hiyo Mh Ali Suleiman Shihata amependekeza mikakati maalum ya kutangaza utalii kupitia wazanzibari wanaoishi nje ya nchi kupitia sera ya zanzibar ili kukuza maendeleo ya kiuchumi na kijamii kupitia sekta ya utalii

SHILINGI MILIONI 10 ZAGAIWA KWA TIMU YA TAIFA YA MPIRA WA MIGUU YA WATU WENYE ULEMAVU

Rais wa jamhuri ya muungano wa Tanzania, Dkt. John Pombe Magufuli ametoa shilingi milioni 10 kwa timu ya taifa ya mpira wa miguu ya  watu wenye ulemavu inayojiandaa kushiriki mashindano ya afrika   kuanza tarehe 01 mwezi ujao, mwaka huu nchini angola.

Katibu wa rais, wa Tanzania  ngusa samike amekabidhi fedha hizo kwa viongozi na wachezaji wa timu hiyo katika hafla iliyofanyika studio za shirika la utangazaji tbc.

Wamesema timu hiyo yenye wachezaji 13, walimu 5 na viongozi 2 itaondoka tarehe 28 mwezi huu,  kuelekea nchini angola ambako inakwenda kushiriki mashindano hayo kwa mara ya kwanza huku wakiahidi kufanya vizuri.

Recent Comments by asha

No comments by asha yet.