Daily Archives: June 9, 2020

BALOZI SEIF AMEWATAKA WAKANDARASI NCHINI KUKAMILISHA MIRADI KWA MUDA ULIOPANGWA

Makamu wa Pili wa Rais wa Zanzibar Balozi Seif Ali Iddi amesema Wahandisi wa Ujenzi Wazalendo kujenga heshima na Uaminifu katika kutekeleza Miradi wanayokabidhiwa ili kujijengea sifa na kuaminika zaidi.

Amesema kuna baadhi ya Wataalamu Wazalendo wasio waaminifu ambao huwadanganya Viongozi na Taasisi zilizowakabidhi miradi ya Ujenzi bila ya kujali muda waliokubaliana wa kukamilisha kazi yenyewe.

Balozi Seif Ali Iddi alitoa kauli hiyo alipofanya ziara fupi ya kukagua maendeleo ya mradi wa Ujenzi wa tangi kubwa la kuhifadhia maji safi na salama katika Kijiji cha Kitope Mbaleni ambao ulichelewa kukamilika katika muda uliopangwa ambapo alilazimika kumuagiza Mkuu wa Wilaya ya Kaskazini “b” kuchukuwa hatua zinazostahiki dhidi ya Wahandisi wa Ujenzi wa Mradi huo.

Alisema Wahandisi Wazalendo ni vyema wakazingatia umuhimu na fursa wanazopewa na Serikali pamoja na Taasisi za Kijamii za kusimamia  miradi ya Maendeleo na Kiuchumi kwa vile Taifa limeshaanza kuridhika na taalum zao badala ya ile tabia ya  kuwakumbatia Wahandisi wa Kigeni

Makamu wa Pili wa Rais wa Zanzibar alimpongeza na kumshukuru Mkuu wa Wilaya ya Kaskazini “b” kwa usimamizi mzuri wa mradi huo uliokuwa ukisuasua katika Utekelezaji wake.

Akitoa Taarifa ya Mradi huo  Katibu Mtendaji wa Taasisi ya Tanzania Youth Icon inayosimamia Ujenzi huo kwa ufadhili wa Taasisi moja ya Umoja wa Mataifa Bwana Abdullah Suleiman alisema Jumla ya Shilingi Milioni 10,000,000 tayari zimeshalipwa katika Awamu ya pili ya Mradi huo.

Nd. Abdullah Suleiman alimueleza Makamu wa Pili wa Rais wa Zanzibar kwamba salio lililobaki litamalizwa mara tu pale Mradi huo muhimu kwa maisha ya Wananchi utakapokamilika na kukabidhiwa rasmi kwa Wahusika ambao ni Serikali.

Naye Mkuu wa Wilaya ya Kaskazini “b” Ndugu Rajab Ali Rajab alisema alilazimika kumpa agizo la kuripoti kwa Mkuu wa Polisi Wilaya ya Kaskazini “b” Asubuhi ya Ijumaa ya tarehe17 Aprili Mwaka huu Mkurugenzi wa Kampuni ya Grative Tanzania Limited yenye Makao Makuu yake Dar es salaam kutoa maelezo ya kina kuhusiana na kuchelewa kumalizika kwa wakati Mradi huo.

Nd. Rajab alisema Makubaliano ya kukamilika kwa mradi huo kati ya Uongozi wa Serikali ya Wilaya hiyo na Uongozi wa Kampuni ya Grative Tanzania Limited yamefikiwa ambapo ifikapo tarehe 25 Juni mradi huo utakabidhiwa Rasmi.

Mapema Asubuhi Makamu wa Pili wa Rais wa Zanzibar Balozi Seif Ali Iddi alizindua rasmi Kisima cha Maji safi na Salama kilichojengwa na Uongozi wa Jimbo la Mahonda kwa ufadhili wa Taasisi ya Misaada ya Hayrat Yardin kilichopo Magharibi ya Skuli ya Mahonda.

Kisima hicho kilichoanza kujengwa Mnamo tarehe 9 Disemba 2019 hadi Tarehe 7 Januari 2020 kwa kuhudumia zaidi ya Wananchi Mia tatu wanaokizunguuka kimegharimu Jumla ya Dola za kimarekani Elfu Nne sawa na Shilingi za Kitanzania zaidi ya Milioni Tisa.

Akizungumza na Wananchi wa Eneo hilo Balozi Seif ambae pia ni Mwakilishi wa Jimbo la Mahonda aliwashukuru na kuwapongeza Viongozi na Watendaji wa Taasisi ya Misaada ya Hayrat  Yarnid kwa kuguswa na changamoto iliyokuwa ikiwakabili Wananchi wa Mahonda ya ukosefu wa huduma hiyo muhimu.

Balozi Seif  alifahamisha kwamba Maji ni huduma muhimu anayolazimika kiumbe kuipata katika Mazingira yake ya kawaida yoyote hasa Mwanaadamu ili kustawisha Uhai na Afya yake.

 

MAMLAKA YA MAWASILIANO NCHINI IMEPANGA MIKAKATI KUKABILIANA NA MATUMIZI MABAYA YA MITANDAO

Waziri wa Habari, Utalii na Mambo ya Kale Mh.Mahmoud Thabit Kombo imeitaka Tume ya Haki za Binaadamu na Utawala Bora ya Tanzania Bara kushirikiana na Mamlaka ya Mawasiliano TCRA  juu ya kudhibiti Matumizi mabaya ya Mitandao yanayosababisha ukiukwaji wa Haki za Binaadamu.

Akizungumza na Ujumbe wa tume hiyo uliofika Ofisi kwake kwa lengo la kubadilishana Mawazo juu ya utendaji wa kazi za Tume hiyo Amesema hatua hiyo itasaidia kufikia lengo la kuanzishwa kwake juu ya kulinda Haki za Binaadamu.

Amesema kuna baadhi ya Watu hutumia Mitandoa kinyume na malengo yaliyokusudiwa na kupelekea kuipotosha Jamii juu ya kutoa taarifa zisizo za ukweli Ndani yake.

Nae Mwenyekiti wa Tume ya Haki za Binaadamu na Utawala Bora kutoka Tanzania Bara Jaji Mstaafu Mathew Pauwa Mhina amesema Tume hiyo itahakikisha inafanya kazi zake kwa Mujibu wa Sheria ili kudhibiti makosa mbalimbali ya Uvunjaji wa Haki za Binaadamu na Utawala Bora.

Wakati huohuo tume hiyo imemkabidhi Waziri wa Habari, Utalii na Mambo ya Kale Mpango Mkakati wa Miaka Mitano wa utelekezaji wa Kazi za Tume hiyo.

 

WAFANYABIASHARA WA SOKO LA KIJANGWANI WAILILIA SERIKALI JUU YA HUDUMA ZA MAJI SAFI PAMOJA UMEME

Wafanyabiashara wa Soko la Kijangwani wameiomba Serikali kuwaekea Miundombinu mizuri katika Soko hilo ili waeweze kufanyabishara zao katika mazingira bora

Wakizungumza na Camera ya Habari za Biashara na Uchumi ya ZBC Wafanyabiashara hao wamesema eneo   waliohamishiwa kwa sasa ni Rafiki kwao kwa Biashara hivyo wameomba kuwekea Umeme na Huduma ya Maji safi na Salama

Aidha wameiomba Serikali kuwaweka katika  Eneo hilo kuwa Maalum katika kuendeleza Shughuli  zao za kufanya Biashara ili  kuepuka kuhamama kila sehemu jambo ambalo linawakimbizia Wateja wao katika Kazi zao.

Soko la Kijangwani limekuja kufuatia Serikali kuwaondosha Wafanyabiasha hao katika Soko la Darajani ili kuondoa msongamano ambao ungepelekea kuenea kwa Maradhi hatari ya Corona.

 

SHILINGI MILIONI ISHIRINI NA NANE KUTUMIKA KATIKA UJENZI WA BARABARA ZA NDANI KWA JIMBO LA MAGOMENI

Kiasi cha Shilingi Milioni Ishirini na Nane zinatarajiwa kutumika katika Ujenzi wa njia 4 za Ndani zenye ukubwa wa Kilomita tatu kwa Kiwango cha Fusi katika    Jimbo la Magomeni.

Wakizungumza na ZBC  Viongozi wa Jimbo hilo wakiwemo Mbunge, Mwakilishi na Madiwani wamesema hatua hiyo ni utekelezaji wa Ilani ya CCM pamoja na kutekeleza kwa Vitendo ahadi walizoziweka kwa Wananchi wa Jimbo hilo.

Wameelea kuwa Ujenzi huo utajumuisha Barabara ya kwa Ali Mzee, Makada, Magomeni Maandalizi na kwa Najim  Nyerere ambazo zilikuwa zikiwapa usumbufu Wananchi wanaozitumia Njia hizo.

Masheha wa Shehia zilizomo Ndani ya Jimbo la Magomeni wamesema kujengwa kwa Barabara hizo zitawaondosjea usumbufu kwa Watumiaji wa njia hizo hasa Wakaazi wa Magomeni waliokuwa wakiupata Muda mrefu.

error: Content is protected !!